Use controls for audio.
kipīkiskwīwininaw
ī-kī-mithikoyahk kā-tipīthihcikīt
kita-isi-nisitohtātoyāhk
kita-nisitohtamāhk nīhithawi-kiskinwahamākīwina,
ācimowina ikwa tāpwīwakīthihtamowina
iyakoni ōho pīkiskwīwina kit-āti-āniskī-āsōnamākiyāhk,
ikosi isi wīstawāw ōtī niyāhk kit-āti-āsōnamākīcik.
ī-kī-mithikowisiyāhk ōma pīkiskwīwin
kita-pimohtamawāyahkwāw
kicawāsimisinawak wīstawāw
kita-kakwī-kiskīthihtahkwāw
mīna kita-kanawīthihtwāw ōma pīkiskwīwin
ikwa nīhithawi-pimācihowin.
mōniyāw ikwa nīhithaw pāpītos kīkway
kā-tāpwīwakīthihtāhkwāw
ikwa mīna ōma ākathāsīmowin namwāc mitoni kāhkithaw
nīhithaw itwīwina ihtakwana iyakohci nīhithawi-pīkiskwīwin
poko kita-āpacihtāniwik kita-kī-isi-asōnamākāniwiki
ōho nīhithāwi-kiskinwahamākīwina.
ōma kāki-othascikātīk nīhithawi-kiskinwahamākīwin
ī-pakosīthihcikātīk
kita-kanawīthihtamāhk ōho nīhithawi-pīkiskwīwina
ikwa nīhithāwi-kiskinwahamākīwina ikwa asici
kāwiy kita-kakwī-kīwīnamāhk anihi
nīhithawi-kiskinwahamākīwina
mīna pīkiskwīwina sāsay kā-wanihtāniwiki
ī-isi-kaskihtāniwik kita-atoskācikātīki ayamiwinīhk isi
ikwa nīhithawi-masinahikīwinihk kita-tāpastāniwiki.
iyakow ōma kita-kitāpahtamāhk kipīkiskwīwininaw
mīna kita-nānākatīthihtamāhk
kita-pakosīthihtamawāyahkwāw
kiskinwahamawākanak
kita-nisitohtāhkwāw nīhithawi-pīkiskwīwina
ikwa nīhithawi-pimācihowina
ikota ohci kita-mamihtīthimocik
onīhithāwiniwāw ohci
kiskīthihtahkwāwi ita kākī-pī-ohci-pimācihothit
otāniskotāpāniwāwa.